Zhduket 14 vjeçarja
Nuk janë të rralla rastet kur qytetarët kërkojnë ndihmën e Policisë për t’i gjetur familjarët e tyre që raportohen të zhdukur. Shumë shpesh angazhohen edhe njësi e grupe vullnetare që të zbulojnë gjurmët e personave që nuk dihet asgjë për fatin e tyre, raporton Gazeta Sinjali.
Një rast i tillë ka ndodhur së fundmi në Rahovec, ku një vajzë 14-vjeçare është zhdukur prej pesë ditësh dhe vendndodhja e saj mbetet ende e panjohur.
Burimet e Gazetës Sinjali bëjnë me dije se rasti është denoncuar në Policinë e Rahovecit nga nëna e të miturës, e cila ka raportuar se vajza e saj është larguar nga shtëpia më 16 prill 2025, rreth orës 14:00, dhe që nga ajo ditë nuk kanë pasur asnjë kontakt me të.
Sipas familjarëve, kjo nuk është hera e parë që e mitura largohet nga shtëpia pa paralajmërim, por kësaj here, mungesa e çdo informacioni dhe kontakti ka shkaktuar ankth dhe pasiguri të thellë për fatin e saj.
Me urdhër të Prokurorit për të Mitur, është hapur rasti si “Person i Zhdukur”, ndërsa njësitë policore janë duke punuar për lokalizimin e saj dhe zbardhjen e rrethanave të këtij largimi.
