Detaje të reja

Një ngjarje e rëndë është shënuar sot në Prishtinë, ku një person dyshohet se ka tentuar t’i japë fund jetës përmes konsumimit të tepruar të medikamenteve. Rasti ka alarmuar ekipet emergjente dhe ka nxitur reagimin e institucioneve përkatëse.

Sinjali mëson se sot, më datë 22 prill 2025, rreth orës 18:00, një person ka kërkuar ndihmë emergjente pas dyshimeve për konsum të tepruar të medikamenteve me qëllim të vetëlëndimit.

Rasti ka ndodhur në Prishtinë, ndërsa personi është dërguar me urgjencë në Qendrën Klinike Universitare të Kosovës (QKUK), ku i është ofruar ndihma mjekësore e menjëhershme.

Burime të gazetës Sinjali bëjnë të ditur se bëhet fjalë për një person të moshës së re, i cili ka qenë në një gjendje të rënduar emocionale dhe ka shprehur ndjenjën e braktisjes, duke përmendur se familja e tij jeton jashtë vendit.

Pas intervenimit të shpejtë të mjekëve, është bërë pastrimi i organizmit dhe vlerësimi i gjendjes së tij fizike dhe psikike.

Burimet tona konfirmojnë se në rast është përfshirë edhe një psikiatër, i cili ka vlerësuar se personi nuk paraqet rrezik të menjëhershëm për veten dhe nuk ka nevojë të ndalohet në repartin psikiatrik.

Gjendja e tij shëndetësore është vlerësuar stabile dhe pas trajtimit, ai është liruar nga QKUK dhe është shoqëruar në vendbanimin e tij në Fushë Kosovë.

Prokurori kujdestar është njoftuar për rastin dhe ka urdhëruar që të merren të gjitha masat për ofrimin e trajtimit të duhur dhe dokumentimin e rastit.

Rasti mbetet nën trajtim të mëtejshëm institucional.

Gazeta Sinjali u bën thirrje të gjithë qytetarëve që përballen me vështirësi të natyrës psikologjike apo emocionale, të mos ngurrojnë të kërkojnë ndihmë profesionale. Jeta është e vlefshme dhe ndihma ekziston. Flisni, kërkoni ndihmë – nuk jeni vetëm.