I mori zinxhirët me forcë, e kërcënoi për familjen dhe e dhunoi

Një ngjarje e rëndë me elemente të dhunës fizike, psikologjike dhe seksuale është raportuar sot në Stacionin Policor në Malishevë, ku një grua ka denoncuar të dashurin e saj për dhunim, kërcënim dhe grabitje.

Gazeta Sinjali mëson se viktima, E.M, 28-vjecare nga Malisheva, ka raportuar se sot, rreth orës 12:00, së bashku me të dyshuarin E.J. 31-vjecar nga Gjilani, ishin ndodhur në Motel Tini, ku kishin pasur një debat të ashpër.

Sipas kallëzimit të saj, gjatë debatit, i dyshuari i ka marrë me forcë dy zinxhirë ari që kishte në qafë, e ka kërcënuar me jetën e familjarëve të saj dhe më pas ka kryer marrëdhënie seksuale me të pa pëlqimin dhe pa dëshirën e saj.

Pas incidentit, viktima ka kërkuar ndihmë dhe është paraqitur në Stacionin Policor në Malishevë, ku ka dhënë deklaratën dhe ka marrë trajtim mjekësor. Në vendin e ngjarjes kanë dalë hetuesit për të mbledhur prova relevante.

I dyshuari aktualisht ndodhet në arrati, ndërkohë që policia po zhvillon operacione për lokalizimin dhe kapjen e tij.

Lidhur me rastin është njoftuar prokurori kujdestar, i cili ka urdhëruar që të iniciohet procedurë penale për veprën “Dhunim”, ndërsa njësia për hetime rajonale është përfshirë në hetim.