Kurti i ik pyetjes për lirinë e medias
Kryeministri në detyrë, Albin Kurti, edhe këtë herë ka shmangur pyetjet e gazetarëve, duke refuzuar të komentojë mbi rënien shqetësuese të Kosovës në Indeksin Botëror të Lirisë së Shtypit, të publikuar nga organizata “Reporterët pa Kufij”.
Pavarësisht interesimit të madh mediatik, Kurti kaloi në heshtje përballë pyetjeve që lidhen me vlerësimin negativ për gjendjen e lirisë së medias në vend.
Kreu i ekzekutivit u pyet nga gazetarët teksa po kthehej në ndërtesën e Qeverisë së Kosovës, pas pjesëmarrjes në hapjen e ekspozitës “Urat”, e organizuar nga Kryesia e Bashkësisë Islame të Kosovës në bashkëpunim me Ministrinë e Çështjeve Fetare të Mbretërisë së Arabisë Saudite.
Derisa Kurti ka ecur pa e thënë asnjë fjalë, truproja ka shtyrë dy herë me forcë dorën e gazetarit e T7.
