Tentuan t’i ikin Policisë, arrestohen si në filma tre persona

Tre persona janë arrestuar sot rreth orës 19:45 në rrugën ‘Gazmend Zajmi’ në Prishtinë, pasi të njëjtit kishin tentuar t’i shmangen Policisë, raporton Gazeta Sinjali.

Zëdhënësja e Policisë së Kosovës për rajonin e Prishtinës, Flora Ahmeti, tha për Sinjalin se patrulla e Policisë kishin sinjalizuar veturën e të dyshuarve që të ndalet në një pikë kontrolli në rrugën ‘Xheladin Hana’, mirëpo të njëjtit nuk janë bindur.

“Sot rreth orës 19:45, një veturë është sinjalizuar nga ana e zyrtarëve policor që  të ndalohet në një pikë kontrolli, në rrugën “Xheladin Hana” në Prishtinë  porse e njëjta  ka provuar t’i shmanget policisë, duke mos u ndalur. Vetura e dyshuar është ndaluar shumë shpejt nga një njësit tjetër patrullues në rrugën “Gazmend Zajmi” me ç’rast janë arrestuar tre persona të dyshuar”, tha Ahmeti.