Gruaja denoncon ish-burrin për shantazh dhe ofendime në rrjete sociale

Dhjetëra raste të dhunës në familje raportohen çdo ditë në Policinë e Kosovës, ku viktima janë kryesisht gratë që pësojnë nga bashkëshortët e familjarët e tjerë. Një rast i tillë është raportuar sot në Stacionin Policor të Pejës, ku një 37-vjeçare ka akuzuar ish-bashkëshortin për shantazh dhe shqetësim të vazhdueshëm.

Burime të Gazetës Sinjali bëjnë me dije se viktima, A.H., ka deklaruar se është e ndarë nga i dyshuari tash e tetë muaj dhe gjatë kësaj kohe nuk kanë pasur asnjë kontakt.

Por, sipas dëshmisë së saj, në 10 ditët e fundit ai ka filluar ta shqetësojë përmes rrjetit social Instagram, duke shpërndarë video-incizime të saj pa pëlqimin e saj dhe duke e fyer vazhdimisht nëpërmjet thirrjeve telefonike.

Ajo ka theksuar se nuk ka pasur dhunë fizike dhe nuk ka pasur nevojë për trajtim mjekësor. Pas intervistimit nga njësia e hetimeve, viktima është larguar me dëshirë për në shtëpinë e saj.

Lidhur me rastin është njoftuar Prokurori Kujdestar, i cili ka urdhëruar që rasti të iniciohet si “Dhunë në familje”, ndërsa hetimet janë në zhvillim.

Gazeta Sinjali do të ndjekë rastin nga afër dhe do të sjellë informacion shtesë në vazhdim.