E dhunoi në park para fëmijëve – Gruaja refuzon strehimin

Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen ngjarje të tilla ku viktima zakonisht janë gratë dhe vajzat që përjetojnë dhunë psikike e fizike kryesisht nga bashkëshortët e tyre, raporton Gazeta Sinjali.

Gazeta Sinjali raporton një rast tjetër të dhunës në familje, që ka ndodhur mbrëmë në Gjakovë, ku një grua është keqtrajtuar fizikisht nga bashkëshorti i saj, teksa ndodhej me të dhe me fëmijët në parkun e qytetit.

Gazeta Sinjali mëson nga burime brenda Policisë se ngjarja ka ndodhur më 16 maj 2025, rreth orës 22:00, në rrugën “Nënë Tereza”. Viktima, rreth 24-vjeçare ka raportuar se është sulmuar fizikisht nga bashkëshorti i saj, Mazllom Zeka, rreth 29-vjeçar, gjatë qëndrimit në park.

Pavarësisht keqtrajtimit, ajo ka refuzuar të strehohet në institucion për mbrojtje të viktimave, duke vendosur që të kthehet në shtëpi së bashku me fëmijët. Ajo ka pranuar ndihmë mjekësore në vendin e ngjarjes, por nuk ka pësuar lëndime trupore.

I dyshuari është larguar nga vendi i ngjarjes dhe aktualisht ndodhet në arrati. Policia ka ndërmarrë veprime për lokalizimin e tij në disa lokacione, por deri më tani pa sukses.

Rasti është nën hetim dhe autoritetet janë duke vazhduar kërkimet për kapjen e të dyshuarit.