Albulena Haxhiu dështon për herë të 23-të
Deputetët e legjislaturës së nëntë janë mbledhur sot në përpjekjen e 23-të me radhë për ta konstituuar Kuvendin e Kosovës dhe zgjedhur Albulena Haxhiun kryeparlamentare. Edhe kjo seancë, sikurse të mëparshmet, përfundoi pa sukses.
Procesi vazhdon të mbetet i bllokuar në votimin e fshehtë.
Lëvizja Vetëvendosje votoi sërish pro themelimit të Komisionit për procedurat e votimit të fshehtë, ndërsa partitë e tjera, PDK, LDK, AAK dhe Lista Serbe, nuk morën fare pjesë në votim.
As në këtë seancë nuk pati ndonjë ndryshim: PDK, LDK, AAK dhe Lista Serbe nuk dhanë emrat e tyre për anëtarë të Komisionit.
Për shkak të mungesës së kuorumit, kryesuesi i seancës konstituive, Avni Dehari, e ndërpreu seancën dhe njoftoi se ajo do të vazhdojë më 31 maj 2025, në ora 10:30.
Deri më tani, deputetët janë mbledhur 23 herë, në çdo 48 orë, por nuk kanë arritur të gjejnë një zgjidhje për të finalizuar konstituimin e Kuvendit.
