Djali e godet me grusht babanë në fytyrë

Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve. Këto raste bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre, raporton Gazeta Sinjali.

Një rast i tillë ka ndodhur sot në komunën e Kllokotit, ku një burrë është rrahur brutalisht nga djali i tij.

Burime të Sinjalit bëjnë me dije se më 29 maj 2025, rreth orës 12:30, Z.S 63 vjeçar ka raportuar në polici se pas një mosmarrëveshjeje me djalin e tij, Slobodan Stajkoviq, 36 vjeçar, i njëjti e ka goditur me grusht në fytyrë disa herë, duke i shkaktuar lëndime trupore në kokë.

Viktima është trajtuar në shtëpinë e shëndetit në Viti dhe pas dhënies së ndihmës mjekësore është liruar.

I dyshuari është arrestuar dhe intervistuar në prezencën e avokatit mbrojtës. Në deklaratë, ai ka mohuar goditjen, duke pretenduar se vetëm e ka shtyrë babain, por Policia konfirmon se nuk është hera e parë që ai ushtron dhunë ndaj tij, duke u konsideruar recidivist.

Me urdhër të Prokurores Kujdestare, është iniciuar rasti penal për “Dhuna në familje”, ndërsa ndaj të dyshuarit është vendosur masa e ndalimit prej 48 orësh.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.