Ky është personi që sulmoi policët

Gazeta Sinjali pak më parë raportoi për një incident i pazakontë që është shënuar në orët e para të mëngjesit të sotëm në Gjakovë, ku një i dyshuar për posedim narkotikësh ka sulmuar zyrtarët policorë dhe ka tentuar të zhdukë provat duke gëlltitur kokainën, mëson Sinjali.

Ngjarja ka ndodhur rreth orës 01:30 të datës 29 maj, në rrugën “Skënderbeu”, ku patrulla e trafikut rajonal kishte ndaluar një veturë të tipit Golf 7, ngjyrë e kuqe, që drejtohej nga një 32-vjeçar.

Sinjali mëson ekskluzivisht se bëhet fjalë për Sylejman Zatriqi.

Gjatë kontrollit fizik, në xhepin e të dyshuarit është gjetur një qese najloni me substancë të bardhë, e dyshuar të jetë kokainë, e cila ishte vendosur mbi tavanin e veturës për të dokumentuar si provë. Në atë moment, Zatriqi ka shtyrë dhe gërvishtur zyrtarët policorë, duke u shkaktuar lëndime në duar, dhe në kaos e sipër, ka marrë qesen dhe e ka gëlltitur.

Kontrolli i mëtejshëm i veturës ka zbuluar edhe një mulli për bluarje, me gjurmë të substancës marihuanë, si dhe disa letra mbështjellëse që përdoren për konsumim të lëndëve narkotike.

Të dy zyrtarët policorë kanë marrë trajtim mjekësor, ndërsa i dyshuari është arrestuar menjëherë dhe me vendim të Prokurorit të Shtetit, është ndaluar për 48 orë.

Të gjitha substancat e sekuestruara do të dërgohen për analizë, ndërsa hetimet janë në vijim.

Shënim: Personai i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.