I vidhet traktori dhe pajisja për mbjelljen e lakrës

Siguria publike në Kosovë konsiderohet se po cenohet nga krime të natyrave të ndryshme, e sidomos nga vjedhjet. Shtëpitë, bizneset e ndryshme në Kosovë dhe hapësirat tjera publike janë shumë shpesh cak i hajnave, të cilët herë vetëm e herë në grup arrijnë të kryejnë vjedhje, raporton Gazeta Sinjali.

Një rast i tillë është raportuar në fshat, ku një bujk ka mbetur pa mjetin kryesor të punës – traktorin dhe pajisjen bujqësore, mëson Sinjali.

Më 28 maj 2025 rreth orës 19:10, qytetari M.S ka njoftuar Policinë se nuk ka mundur të gjejë traktorin e tij të tipit “Internacional”, ngjyrë e kuqe, me kabinë dhe pa mbulesën e përparme mbi motor, të cilin e kishte lënë në arën e tij në vendin e njohur si Razlifkë, nga ora 21:30 e mbrëmjes së 27 majit.

Përveç vetë mjetit bujqësor, hajnat kanë marrë edhe pajisjen për mbjelljen e lakrës, që ishte e vendosur në traktor. I njëjti ka deklaruar se traktori ishte lënë pa përkujdesje dhe nuk ka dyshime konkrete për ndonjë person të caktuar.

Hetimet janë duke vazhduar për të identifikuar autorin/ët dhe për të mundësuar kthimin e mjetit të vjedhur.