Ekskluzive: E dhunoi para syve të bashkëjetuesit

Numri i rasteve të ngacmimeve, sulmeve e dhunës seksuale në vendin tonë ka marrë përmasa shqetësuese. Të dyshuarit, që në shumicën e rasteve janë persona të moshës madhore e madje edhe të moshuar, shfrytëzojnë çfarëdo forme që t’i keqpërdorin vajzat dhe gratë. 

Një rast i tmerrshëm i dhunimit seksual ka ndodhur në orët e para të mëngjesit të 30 majit, në Lipjan, ku një grua ka përjetuar tmerrin brenda shtëpisë së saj, nën kërcënimin e armës së ftohtë dhe në praninë e bashkëjetuesit.

Sinjali mëson se i dyshuari është A.S, rreth 65-vjeçar,i cili  ka hyrë me forcë në shtëpinë e viktimës D.R., rreth 60-vjeçare dhe partnerit të saj Xh.Z, rreth 40-vjeçar.

I armatosur me një thikë dhe një çekan, i dyshuari ka kërcënuar çiftin dhe më pas e ka dhunuar seksualisht gruan në prani të bashkëjetuesit të saj, duke lënë pasoja të rënda psikologjike dhe fizike.

Viktima ka kërkuar menjëherë ndihmë dhe është dërguar për trajtim mjekësor. Ndërkohë, rasti është raportuar në polici dhe në vendin e ngjarjes kanë dalë njësitë relevante – Hetimet Rajonale, Forenzika Rajonale, si dhe është vënë në dijeni Prokurori për Krime të Rënda.

Me urdhër të prokurorit, i dyshuari është ndaluar për 48 orë dhe ndaj tij kanë nisur hetimet për veprën e dhunimit, e cila sipas Kodit Penal të Republikës së Kosovës kategorizohet si krim i rëndë që dënohet rëndë me burgim afatgjatë.