Ekskluzive: E përzuri nga shtëpia bashkë me fëmijët dhe e kërcënoi gruan nga telefoni- 47 vjeçari shpallet në kërkim për dhunë në familje në Prishtinë

Numri i rasteve të dhunës në familje në vendin tonë ka marrë përmasa shqetësuese. Viktima të shpeshta janë gratë dhe vajzat, të cilat përballen me dhunë fizike dhe psikike nga bashkëshortët apo partnerët e tyre, shpeshherë për vite me radhë pa pasur guximin ta denoncojnë.

Një rast i tillë është raportuar së fundmi në Prishtinë, ku një grua ka vendosur t’i japë fund heshtjes pas 15 vitesh martesë dhe të denoncojë dhunën sistematike që pretendon se e ka përjetuar nga bashkëshorti i saj.

Burimet e Gazetës Sinjali bëjnë me dije se ngjarja është denoncuar më 28 maj 2025, rreth orës 20:00, nga L.K., rreth 37-vjeçare, e cila ka treguar në polici se për më shumë se 10 vjet ka qenë viktimë e dhunës fizike dhe psikike, por nuk ka raportuar më herët për shkak të frikës dhe presionit.

Sipas dëshmisë së saj, situata ka dalë jashtë kontrollit tre javë më parë, kur i dyshuari A.T., rreth 47-vjeçar, e ka përzënë me dhunë nga shtëpia bashkë me fëmijët, duke e lënë pa strehim. Dy ditë para denoncimit, ai e kishte kërcënuar edhe përmes telefonit, duke ia shtuar ndjesinë e pasigurisë.

Viktima ka deklaruar se aktualisht po qëndron tek familja e saj dhe se nuk ka nevojë për trajtim mjekësor, por ndjehet seriozisht e kërcënuar dhe e pasigurt.

Lidhur me rastin është njoftuar Prokurori kujdestar për dhunë në familje, i cili ka urdhëruar: Inicimin e rastit si “Dhunë në familje” dhe kërkimin dhe ndalimin e personit të dyshuar.

Policia është në kërkim të dyshuarit, ndërsa rasti është nën hetim nga njësitet përkatëse.