Policia apelon për kujdes pas shtimit të arinjve pranë zonave turistike në Brezovicë

Policia e Kosovës ka lëshuar një apel urgjent për kujdes të shtuar pas rritjes së dukshme të pranisë së arinjve në afërsi të vendbanimeve dhe zonave turistike, veçanërisht rreth liqeneve të Brezovicës, shkruan Gazeta Sinjali.

Në njoftimin zyrtar thuhet se janë raportuar raste të shumta të hasjes së arinjve pranë liqenit të Jazhincës dhe zonave përreth, ku qëndrojnë çdo ditë dhjetëra turistë dhe vizitorë, duke u ekspozuar në mënyrë të rrezikshme ndaj këtyre kafshëve të egra.

Policia thekson se qytetarët, në veçanti familjet me fëmijë, duhet të shmangin çdo përpjekje për të fotografuar apo regjistruar arinjtë nga afër, pasi një distancë prej vetëm 10-20 metrash përbën rrezik serioz për jetën.

“Afërsia me kafshët e egra mund të çojë në pasoja të rënda. Ju lutemi tregoni kujdes të shtuar gjatë qëndrimit në natyrë dhe respektoni udhëzimet për siguri,” thuhet në apelin e Policisë.

Autoritetet kanë paralajmëruar marrjen e masave parandaluese në bashkëpunim me institucionet përkatëse dhe kanë kërkuar ndihmën e mediave për vetëdijesimin e qytetarëve.