Bill Gates: 200 miliardë dollarë për shëndetësi dhe arsim në Afrikë

Themeluesi i Microsoft-it, Bill Gates, ka deklaruar se pjesa më e madhe e pasurisë së tij, rreth 200 miliardë dollarë, do të investohet në përmirësimin e shërbimeve shëndetësore dhe arsimore në Afrikë gjatë dy dekadave të ardhshme, shkruan Gazeta Sinjali.

Në një fjalim të mbajtur në Addis Ababa të Etiopisë, Gates theksoi rëndësinë e shëndetit dhe arsimit për zhvillimin e kontinentit afrikan.

“Duke çliruar potencialin njerëzor përmes shëndetit dhe arsimit, çdo vend në Afrikë duhet të jetë në rrugën e prosperitetit”, tha ai.

Ai gjithashtu inkurajoi të rinjtë afrikanë të përdorin Inteligjencën Artificiale për të ndihmuar sistemet shëndetësore lokale. Gates ka njoftuar më herët se planifikon të dhurojë 99% të pasurisë së tij deri në vitin 2045, kur fondacioni i tij do të mbyllë operacionet.