Detaje të reja

Gazeta Sinjali raportoi gjatë ditës së djeshme për një aksident që ka ndodhur në fshatin Grazhdanik të Prizrenit, ku si pasojë e përplasjes ndërmjet një veture dhe një motoçiklete ka humbur jetën një i mitur, ndërsa dy persona të tjerë kanë mbetur të lënduar.

Sinjali ka zbuluar gjithashtu se dy personat e lënduar janë Kushtrim Krasniqi, 30-vjeçar, dhe Donjeta Dervishaj, 32-vjeçare, ndërsa personi që humbi jetën është Geltian Shala, 17-vjeçar

Sinjali mëson ekskluzivisht se në vendin e ngjarjes, ku është gjetur trupi i pajetë, është gjetur edhe një revole. Arma është zbuluar nga qytetarët, ndërkaq policia është njoftuar dhe ka bërë tërheqjen e saj.

Aksidenti ndodhi kur një motoçikletë elektrike, pa targa, e drejtuar nga Geltian Shala, tentoi të futej në rrugën kryesore, ndërsa nga drejtimi tjetër po qarkullonte një veturë tip VW Golf, e drejtuar nga Kushtrim Krasniqi.

Pas aksidentit, motoçiklisti i mitur ishte dërguar me urgjencë në QKUK në Prishtinë për trajtim intensiv, ku u raportua në gjendje kritike për jetën. Fatkeqësisht, më 1 qershor 2025, rreth orës 21:30, mjekët e QKUK-së konfirmuan vdekjen e tij.

Me urdhër të prokurorit kujdestar, trupi i pajetë është dërguar në Institutin e Mjekësisë Ligjore për autopsi, ndërsa rasti është iniciuar si “Aksident trafiku me pasoja fatale” dhe është nën hetim nga njësitë përkatëse.