Një 16-vjeçar shqiptar plagoset rëndë me thikë në Itali

Një 16-vjeçar me origjinë shqiptare është plagosur rëndë pas një sulmi me thikë të ndodhur mbrëmjen e së shtunës në qytetin Vicenza të Italisë, në një zonë pranë qendrës historike. I mituri u godit në gjoks dhe ndodhet i shtruar në kujdesin intensiv pediatrik në spitalin lokal, shkruan Gazeta Sinjali.

Autoritetet shëndetësore bëjnë të ditur se, ndonëse në gjendje të rëndë, jeta e tij nuk është në rrezik.

Sipas policisë, autori i dyshuar është një tjetër i ri, ndoshta bashkëmoshatar i viktimës. Hetimet po zhvillohen në disa pista, ndër të cilat edhe një tentativë grabitjeje që përfundoi në dhunë, por nuk përjashtohen as motive të tjera.

Dëshmitarët në zonë dhanë menjëherë alarmin, ndërsa ambulanca e emergjencës Suem 118 mbërriti në vendngjarje dhe transportoi të plagosurin drejt spitalit. Mediat italiane raportojnë se ngjarja ndodhi në Via Cattaneo, një zonë e populluar dhe me qarkullim të madh. Policia po punon për identifikimin e autorit, ndërsa dëshmia e të plagosurit pritet të ndihmojë në zbardhjen e plotë të rastit.