E dhimbshme: Ky është 63-vjeçari që vdiq në vendin e punës
Një ngjarje e rëndë është shënuar mëngjesin e së dielës në qytetin e Gjakovës, ku një burrë ka humbur jetën papritur derisa ndodhej në vendin e tij të punës, raporton Gazeta Sinjali.
Sinjali mëson se viktima është Bekim Kastrati, 63-vjeçar nga Gjakova, i cili është dërguar pa shenja jete në Emergjencën e qytetit rreth orës 08:45 të mëngjesit.
Lajmin e ka konfirmuar edhe zëdhënësi i Policisë së Gjakovës, Sheremet Elezaj.
“Një mashkull i lindur në vitin 1962 është dërguar pa shenja jete në Spitalin e Përgjithshëm në Gjakovë, ku është konstatuar vdekja e tij”.
“Nga hetimet e para dyshohet se viktimës i është përkeqësuar gjendja shëndetësore në vendin e punës (ku ishte duke punuar si roje sigurie), në rrugën “Wesley Clark”, rreth orës 08:45”, tha Elezaj për Gazetën Sinjali.
Me vendim të prokurorit, rasti është iniciuar si “Hetim i vdekjes”, ndërsa trupi i pajetë i viktimës është dërguar për ekzaminim mjeko-ligjor. Hetimet janë në zhvillim për zbardhjen e plotë të ngjarjes.
