Rrëmbimi i 19-vjeçares

Një zhvillim i ri është shënuar në rastin e rrëmbimit të një të reje 19-vjeçare në Gjilan, ngjarje që kishte alarmuar Policinë dhe opinionin publik më 7 qershor 2025.

Burime të sigurta të Sinjalit brenda hetuesisë konfirmojnë se pas veprimeve intensive nga Njësia e Hetimeve, i dyshuari për rastin, Admir Qehaja, është paraqitur vetë në polici, së bashku me viktimën E. Sh., më 8 qershor rreth orës 17:30.

Sipas Policisë, veprimet operative kanë ndikuar që i dyshuari të dorëzohet, ndërsa menjëherë pas paraqitjes së tij, të dy janë intervistuar nga hetuesit, në prani të Prokurores së Shtetit. Pas shqyrtimit të provave të mbledhura deri në këtë fazë, Prokuroria ka urdhëruar ndalimin e të dyshuarit për 48 orë, për veprën penale të “Privimit të kundërligjshëm të lirisë”.

Hetimet janë në zhvillim e sipër dhe pritet të vazhdojnë me qëllim zbardhjen e plotë të rrethanave të rastit, si dhe vlerësimin e mundshëm të elementeve shtesë penale.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.