E rrah babain e tij të moshuar në gjendje të dehur

Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve. Këto raste bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre, raporton Gazeta Sinjali.

Një rast i tillë i dhunës në familje është regjistruar në orët e para të mëngjesit të së hënës në Vushtrri, ku një burrë në gjendje të dehur ka sulmuar fizikisht babain e tij 83-vjeçar, duke e rrëzuar në tokë me goditje.

Burimet e Sinjalit bëjnë me dije se më 9 qershor 2025, rreth orës 03:30, Policia ka ndërhyrë në një rast të dhunës familjare të ndodhur në rrugën “Lidhja e Lezhës”, pas raportimit të viktimës M.M., 83 vjeçar, i cili ka deklaruar se, teksa ishte duke fjetur, është zgjuar nga zhurma dhe ka hasur të birin, B.M., 59 vjeçar, në gjendje të rënduar të dehjes.

Sipas tij, pas tërheqjes së vërejtjes për sjelljet e tij, i dyshuari e ka goditur me shkelm në bark, duke e rrëzuar në tokë. Në momentin e incidentit ka ndërhyrë edhe djali tjetër i viktimës, E.M., 42 vjeçar, për të ndalur të dyshuarin, deri në mbërritjen e patrullës policore.

Të gjitha palët e përfshira janë dërguar fillimisht për tretman mjekësor, e më pas janë shoqëruar në Stacionin Policor. I dyshuari, për shkak të gjendjes së dehur, është intervistuar vetëm pas orës 08:50, në prani të avokatit mbrojtës.

Me udhëzim të Prokurorit kujdestar, rasti është iniciuar si “Dhuna në familje”, ndërsa i dyshuari është ndaluar për 48 orë.