Grabitje me elektroshok në AZ-Tech

Krimet e dhunshme po vazhdojnë të jenë një shqetësim serioz në vend, ku siguria e qytetarëve vihet në pikëpyetje edhe gjatë ditës. Një tjetër grabitje e armatosur ka ndodhur në zemër të Prishtinës, ku një person i maskuar ka sulmuar një dyqan elektronikash dhe ka arritur të ikë me para të gatshme.

Burime të sigurta të Sinjalit bëjnë me dije se ngjarja ka ndodhur rreth orës 13:00 në rrugën “Ilir Konushevci”, në një dyqan elektronikash me emrin “AZ Tech”, ku një person ende i paidentifikuar ka hyrë i maskuar me maskë të kaltër dhe i pajisur me elektroshok në dorë.

Sipas informacioneve të para, i dyshuari ka hyrë në lokal dhe ka kërcënuar punëtorët me mjetin elektrik, duke arritur t’u marrë 200 euro para të gatshme, përpara se të largohej me shpejtësi nga vendi i ngjarjes në drejtim të rrugëve përreth.

Në vendin e ngjarjes kanë dalë menjëherë njësitë policore, përfshirë hetuesit dhe forenzikën, të cilët kanë nisur hetimet për të identifikuar dhe kapur autorin. Deri më tani nuk raportohet për të lënduar fizikisht, ndërsa dëshmitarët që ishin prezentë në lokal në momentin e grabitjes janë intervistuar nga Policia.

Me urdhër të prokurorit kujdestar, rasti është cilësuar si “Grabitje” dhe i dyshuari ndodhet ende në arrati.