Ky është 39-vjeçari që u arrestua për armëmbajtje pa leje

Sot u raportua për një rezultat të hetimeve të një rasti të mëhershëm, ku hetuesit e Njësisë Rajonale të Hetimeve të Drejtorisë Rajonale të Policisë – Mitrovicë Jugu, kanë arritur të identifikojnë një person të dyshuar për armëmbajtje pa leje dhe përdorim të armëve.

Sinjali mëson ekskluzivisht se i dyshuari, është Besnik Lahu, 39-vjeçar nga Vushtrria, i cili ishte filmuar duke shtënë me dy armë zjarri të ndryshme në dy videoincizime të siguruara nga policia.

Pas konsultimit me prokurorin, hetuesit e policisë kanë shkuar në vendbanimin e tij, ku ai ka dorëzuar armët dhe municionin që më pas janë konfiskuar si prova materiale.

Në momentin e arrestimit, janë gjetur dhe konfiskuar: një pushkë ajrore, një pistoletë e llojit CZ me dy karikatorë të zbrazët, një mbajtëse/kuti e pistoletës, një armë AK 47 me një karikator dhe njëzet copë fishekë 7.62 x 39 mm.

I dyshuari është shoqëruar në stacionin e policisë për intervistim dhe veprime të tjera procedurale. Ndaj tij është iniciuar një rast për veprat penale “Mbajtja në pronësi, kontroll, posedim të paautorizuar të armëve” dhe “Përdorim i armës apo mjetit të rrezikshëm”.

Me urdhër të prokurorit, ndaj Besnik Lahut është caktuar masa e ndalimit policor për 48 orë. Hetimet vazhdojnë për sqarimin e mëtejshëm të rastit.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.