Raportohet se Foda do të largohet nga Kosova

Dueli Sportiv mëson ekskluzivisht se trajneri i Kombëtares së Kosovës, Franco Foda, ka hyrë në negociata të avancuara me klubin saudit Al-Wehda, duke synuar një largim nga drejtimi i “Dardanëve”.

Burime të sigurta të Dueli Sportiv konfirmojnë se gjermani Foda, i cili është në krye të ekipit kombëtar të Kosovës, është duke kërkuar një pagë shumë milionëshe te skuadra e Al-Wehda.

Trajneri 58-vjeçar dëshiron ta mbyllë marrëveshjen me Al-Wehda brenda javëve në vazhdim, përpara se Kosova të nisë fazën përgatitore për kualifikueset e Kupës së Botës, që nisin në muajin shtator.

Takimet mes përfaqësuesve të Fodës dhe drejtuesve të Al-Wehda tashmë kanë ndodhur, dhe gjithçka pritet të konkretizohet në javët në vazhdim. Nëse palët arrijnë marrëveshje, Franco Foda do të largohet nga posti i përzgjedhësit të Kosovës pas më pak se një viti në krye të ekipit kombëtar.

Situata ka ngritur shqetësime brenda Federatës së Futbollit të Kosovës, pasi largimi i mundshëm i Fodës në këtë fazë delikate mund të krijojë një vakum të madh në drejtimin e skuadrës para ndeshjeve vendimtare.