U raportua për largimin e Fodës, reagon FFK-ja: Ka obligime kontraktuale me ne

Pas raportimeve që dolën nga mediat e Emirateve Arabe lidhur me një ofertë për përzgjedhësin Franco Foda nga klubi Al-Wahda, ka reaguar i pari i Federatës së Futbollit të Kosovës, Agim Ademi.

U përfol se Foda mund të largohet gjatë kësaj vere, para fillimit të ndeshjeve kualifikuese për Kampionatin Botëror 2026, duke shkaktuar shqetësim tek sportdashësit në vend. Por Ademi ka mohuar çdo informacion që sugjeron një largim të mundshëm të trajnerit gjerman.

Përmes një postimi në profilin e tij zyrtar, Ademi tha se FFK-ja nuk ka marrë asnjë njoftim zyrtar nga Foda apo përfaqësuesit e tij, dhe se kontrata aktuale është në fuqi.

“Pas raportimeve se përzgjedhësi Franco Foda është pranë largimit nga posti i tij në Kombëtaren tonë, dëshiroj të informoj opinionin publik se as unë, si President, dhe as FFK-ja si institucion, nuk kemi marrë asnjë njoftim zyrtar nga përfaqësuesit e përzgjedhësit Foda apo nga ndonjë palë tjetër”.

“Foda aktualisht ka obligime kontraktuale me ne dhe presim që ato obligime të përmbushen, veçanërisht tani, në këtë fazë të rëndësishme të fushatës kualifikuese për Kampionatin Botëror, drejt së cilës shkojmë me optimizëm dhe dëshirë të madhe për sukses”, ka shkruar Ademi.