Osmani pas medaljes së Laurës: Krenaria jonë, ajo po e mban flamurin e Kosovës lart

Presidentja e Kosovës, Vjosa Osmani, ka përgëzuar xhudisten Laura Fazliu për suksesin e madh në Kampionatin Botëror për Seniorë që po mbahet në Budapest, ku ajo fitoi medaljen e bronztë, shkruan Gazeta Sinjali.

Përmes një postimi në rrjetin social “X”, Osmani ka lavdëruar paraqitjen e Fazliut, duke e cilësuar si një simbol të përkushtimit, talentit dhe fuqisë së sportit kosovar.

“Laura Fazliu ka shkëlqyer në Kampionatin Botëror për Seniorë në Budapest, duke fituar medaljen e bronztë në një garë të jashtëzakonshme!”, ka shkruar Presidentja.

Ajo ka theksuar se Laura “ka treguar forcën e sportit tonë dhe shpirtin e vajzave tona që nuk ndalen kurrë”, duke shtuar se ajo “vazhdon ta mbajë flamurin e Kosovës lart në arenat më të mëdha ndërkombëtare”.

Osmani ka shprehur mirënjohje të veçantë edhe për ekipin që qëndron prapa suksesit të Laurës: “Një falënderim i veçantë për trajnerët e saj, legjendat Driton Kuka dhe Majlinda Kelmendi, për punën e palodhshme dhe përkushtimin ndaj brezit të ri të kampionëve”.

Postimin e saj, Presidentja e ka përmbyllur me fjalët: “Urime Laura – krenaria jonë!”.