Vazhdon mandati teknik i EULEX-it në Kosovë, Osmani: Të respektohet e drejta evropiane

Sot është zyrtarizuar vazhdimi i mandatit teknik të Misionit të Bashkimit Evropian për Sundimin e Ligjit në Kosovë (EULEX), përmes shkëmbimit të letrave ndërmjet institucioneve të Kosovës dhe Bashkimit Evropian, shkruan Gazeta Sinjali.

Presidentja e Republikës së Kosovës, Vjosa Osmani, në letrën drejtuar Përfaqësueses së Lartë të BE-së për Politikë të Jashtme dhe Siguri, Kaja Kallas, ka theksuar se mandati i ri i EULEX-it mbetet teknik, pa fuqi ekzekutive, dhe është i fokusuar vetëm në monitorim, mentorim dhe këshillim të institucioneve vendore të drejtësisë.

Në të njëjtën letër, Osmani ka kërkuar që EULEX të dorëzojë të gjitha dokumentet që posedon nga periudha kur kishte mandat ekzekutiv, me qëllim të rritjes së transparencës dhe ndihmës për institucionet vendore të drejtësisë.

Po ashtu, Presidentja ka kërkuar që të gjitha veprimet e misionit të jenë në përputhje me Konventën Evropiane për të Drejtat e Njeriut si dhe me jurisprudencën e Gjykatës Evropiane për të Drejtat e Njeriut.