E kap për flokësh dhe e grushton gruan në park

Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen ngjarje të tilla ku viktima zakonisht janë gratë dhe vajzat që përjetojnë dhunë psikike e fizike kryesisht nga bashkëshortët e tyre, raporton Gazeta Sinjali.

Një rast i tillë ka ndodhur mbrëmjen e së martës në Gjakovë, ku një grua ka përjetuar dhunë fizike në një zonë publike, duke tronditur qytetarët që ndodheshin aty pranë.

Burime të Sinjalit bëjnë me dije se mbrëmë, rreth orës 20:30, në Parkun e Qytetit në Gjakovë, ka ndodhur një sulm fizik, ku F.G., rreth 24-vjeçar pas një konflikti verbal, ka sulmuar bashkëjetuesen e tij V.G.P., rreth 24-vjeçare.

Sipas viktimës, i dyshuari e ka kapur për flokësh dhe e ka goditur me grushte në trup, përpara se të ikte në drejtim të panjohur. Ajo ka pësuar lëndime të lehta (gërvishtje) dhe ka marrë trajtim mjekësor, ndërsa ka refuzuar të strehohet dhe është kthyer në familjen e saj, duke deklaruar se ndjehet e sigurt.

Policia ka tentuar të lokalizojë të dyshuarin, por ai nuk është gjetur në vendbanimin e tij, dhe aktualisht vazhdohet të kërkohet.

Lidhur me rastin është njoftuar prokurori kujdestar, ndërsa hetimet janë duke u zhvilluar nga njësia përkatëse. Në momentin e arrestimit të të dyshuarit, prokurori do të informohet sërish për veprime të mëtejshme procedurale.