Nënshkruhet marrëveshja e binjakëzimit ndërmjet Podujevës dhe qytetit Ames të IOWA-s

Postimi i Komunës së Podujevës:

Në shënim të 26-vjetorit të çlirimit të Podujevës, Kuvendi Komunal ka mbajtur seancë solemne, ku janë kujtuar e nderuar heronjtë, dëshmorët e martirët dhe të gjithë ata që kanë kontribuuar për lirinë. Seanca e kryesuar nga Kryesuesi i Kuvendit, Hilmi Hoxha, ka filluar me intonimin e himnit kombëtar e atij shtetëror të Kosovës.

Kryesuesi Hoxha tha se po e shënojnë me krenari 26-vjetorin e çlirimit të Podujevës.

“Në këtë ditë të shënuar ne kujtojmë me respekt dhe përulësi të gjithë heronjtë, dëshmorët dhe martirët, të cilët sakrifikuan gjithçka për lirinë tonë. Këtu u ngritën heronjtë që luftuan për të vërtetën dhe të ardhmen e brezave që vijnë. Ne nuk do ta harrojmë kurrë kontributin e Ushtrisë Çlirimtare të Kosovës dhe të çdo qytetari që dha gjithçka për një Kosovë të lirë”, u shpreh Hoxha.

Ndërsa, Kryetari i Komunës, Shpejtim Bulliqi, e vlerësoi 19 Qershorin si një pikë kthese në rrugëtimin për liri.
“Sot jemi mbledhur në këtë seancë solemne për të shënuar 26-vjetorin e çlirimit të Komunës së Podujevës. Kjo ditë, 19 Qershori, nuk është vetëm një pikë kthese në rrugëtimin tonë për liri dhe pavarësi, por është edhe një kujtesë e përhershme për sakrificën, qëndresën dhe guximin e atyre që luftuan për një Kosovë të lirë e sovrane”, theksoi Kryetari Bulliqi.

Ai tutje shtoi se me nderim të thellë përkulen para veprës së dëshmorëve të kombit, të cilët dhanë jetën për lirinë.

“I kujtojmë me respekt e mirënjohje të veçantë kontributin e jashtëzakonshëm të ushtarëve të Zonës Operative të Llapit, që përbën një nga shtyllat kryesore të Ushtrisë Çlirimtare të Kosovës. Komandantët dhe ushtarët e saj që shkruan me gjak dhe me sakrificë historinë tonë më të lavdishme”.

Me një fjalë rasti të pranishmëve u është drejtuar edhe ish-komandanti i Zonës Operative të Llapit, Rrustem Mustafa.

Gjatë kësaj seance është mbajtur edhe ceremonia e nënshkrimit të marrëveshjes së binjakëzimit ndërmjet Komunës së Podujevës dhe qytetit Ames të IOWA-s së SHBA-së.

Fillimisht nëpërmjet një videoje nga Amerika të pranishmëve u është drejtuar Kryetari i qytetit Ames, John Haila, i cili e ka bërë zyrtarisht nënshkrimin e marrëveshjes për binjakëzim.
Të njëjtin hap e ka ndjekur Kryetari i Komunës së Podujevës, Shpejtim Bulliqi, i cili pasi e nënshkroi marrëveshjen tha se ky binjakëzim është një urë e re miqësie, bashkëpunimi dhe përkushtimi të ndërsjellë për të ardhmen e dy qyteteve.

“Është një nder i veçantë dhe një emocion i madh për mua dhe për qytetarët e Podujevës që po nënshkruajmë sot marrëveshjen e binjakëzimit ndërmjet Komunës së Podujevës dhe Qytetit Ames të shtetit IOWA. Lidhjet mes Kosovës dhe Shteteve të Bashkuara janë të thella dhe të rrënjosura në historinë tonë. Populli i Kosovës nuk do ta harrojë kurrë rolin vendimtar të SHBA-ve në mbështetjen e çlirimit, pavarësisë dhe ndërtimit të institucioneve tona demokratike”, tha Kryetari Bulliqi.
Sipas tij, binjakëzimi i Podujevës me qytetin Ames nuk është vetëm një simbolikë protokollare.

“Ajo është një platformë konkrete për shkëmbim përvojash në fusha me rëndësi për qytetarët tanë: në arsim, kulturë, bujqësi, zhvillim ekonomik, teknologji dhe qeverisje lokale. Besoj fuqishëm se ky partneritet do të sjellë fryte të prekshme për të dyja komunat tona, për të rinjtë, për komunitetin e biznesit, për institucionet arsimore dhe për të gjithë qytetarët.
Nëpërmjet teleprezencës, seancën e ka ndjekur Kryetari i Ames, John Haila, i cili tha se mezi presin të krijojë një marrëdhënie të fortë dhe produktive, duke përfshirë bujqësinë, arsimin, ekonominë, kulturën, etj.

Nga një fjalë rasti e kanë mbajtur edhe Presidentja e Shoqatës së qyteteve partnere ndërkombëtare të Ames, Karla McCollum (me teleprezencë) dhe Gjeneral-major Timothy Orr, i cili bashkë me zyrtarë tjerë të Ames të cilët janë duke qëndruar në Podujevë dhe ishin prezent në seancën solemne.