Këta janë dy të arrestuarit për fajde

Gazeta Sinjali ka siguruar ekskluzivisht identitetin e dy personave të arrestuar për një rast të rëndë të fajdes që u zbulua në Malishevë, pas një hetimi të nisur nga Policia e Kosovës.

Sinjali mëson ekskluzivisht se të arrestuarit janë: Mentor Kastrati, rreth 39-vjeçar dhe Zaim Paqarizi, rreth 49-vjeçar.

Sipas informacioneve që posedon Sinjali, dyshja dyshohet se i kanë huazuar para viktimës E.K(1993), duke i kërkuar kamatë mujore prej 20%, një praktikë që bie ndesh me ligjin penal.

Viktima kishte raportuar në polici se në muajin janar të këtij viti kishte marrë 3.000 euro nga të dyshuarit dhe për katër muaj kishte paguar nga 600 euro në muaj si kamatë. Gjithsej kishte paguar 2.400 euro vetëm për interes.

Përveç kësaj, ai ka marrë edhe tri herë nga 1.000 euro, për të cilat ka kthyer nga 1.200 euro brenda tri javësh.

Në muajin maj, viktima ka marrë sërish një shumë prej 3.000 euro, për të cilën ishte kushtëzuar që deri më 20 qershor 2025, nëse nuk kthen shumën, borxhi do t’i rritej në 4.100 euro.

Pas intervistimit të palëve, Prokuroria ka urdhëruar ndalimin e të dyshuarve për 48 orë, ndërsa rasti është nën hetim nga njësitë përkatëse në Policinë e Kosovës.

Hetimet vazhdojnë dhe Sinjali do të sjellë informacione të reja për këtë skandal të fajdes në Malishevë.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.