Fshehu pasurinë dhe përfitoi ndihma sociale – dënohet një grua nga Kosova në Zvicër

Një grua 74-vjeçare me prejardhje nga Kosova, që jeton në Kantonin Aargau të Zvicrës, është shpallur fajtore për mashtrim të shumëfishtë dhe fshehje të të ardhurave, pasi kishte përfituar ndihma financiare nga shteti në mënyrë të paligjshme, shkruan Gazeta Sinjali.

Sipas autoriteteve zvicerane, ajo dhe bashkëshorti i saj (tani i ndjerë) kishin dështuar të deklaronin rreth 349 mijë franga pasuri në vitet 2013-2014, duke krijuar një vlerësim të rremë tatimor.

Si rezultat, çifti përfitoi ulje të primit të sigurimeve shëndetësore në vitet 2016 dhe 2017, në vlerë totale prej mbi 1,600 franga.

Prokuroria e kantonit e ka dënuar gruan me 60 ditë gjobë me kusht (nga 30 franga në ditë) dhe një gjobë shtesë prej 400 frangash, si dhe 900 franga për shpenzimet procedurale.

Rasti u zbulua gjatë një rishikimi tatimor të nisur në vitin 2022, përmes të cilit autoritetet kantonale konfirmuan fshehjen e të ardhurave dhe mashtrimin.

Autoritetet theksojnë se çdo pasuri e padeklaruar mund të hetohet deri në 15 vjet pas periudhës tatimore përkatëse.