Avokati Besnik Berisha: Arrestimi i dy eprorëve është një film i panevojshëm – dëmton imazhin e Policisë

Avokati Besnik Berisha ka reaguar pas arrestimit dhe ndalimit të dy eprorëve të Policisë së Kosovës në Pejë, të shtunën në mbrëmje, duke e cilësuar këtë veprim si të panevojshëm dhe dëmtues për institucionin e Policisë, shkruan Gazeta Sinjali.

Përmes një postimi në Facebook, Berisha ka thënë se arrestimi është bërë në mënyrë joproporcionale dhe pa arsye të qëndrueshme procedurale.

“Një veprim jo proporcional, i pajustifikuar proceduralisht, që nuk ndihmon drejtësinë por dëmton rëndë imazhin e Policisë. Atëherë pse ndalim, pse pranga, kujt i shërben kjo?!! Përgjigjja është e thjeshtë: spektaklit, jo drejtësisë,” ka shkruar ai.

Sipas avokatit, mënyra se si është trajtuar rasti përbën një shembull të keqpërdorimit të zbatimit të ligjit për përfitime personale apo promovim, duke u bërë në dëm të institucioneve të rendit dhe drejtësisë.

“Nuk mbrohet rendi duke e përdhosur institucionin. Nuk ndërtohet drejtësia duke ndëshkuar përmes skenave të panevojshme,” ka përfunduar Berisha.