4-vjeçari vdes pasi u shkel nga kushëriri me veturë

Një ngjarje e rëndë është regjistruar të dielën në fshatin Dardani të komunës së Ferizajt, ku një fëmijë i moshës 3 vjeç e gjysmë ka humbur jetën në një incident të rëndë trafiku, për të cilin po hetohet një i afërm i tij.

Burime të Sinjalit bëjnë me dije se rreth orës 18:15 të datës 22 qershor 2025, në rrugën “Nektari” nr. 42, i dyshuari Gentijan Bytyqi, 21 vjeçar dyshohet se gjatë lëvizjes së automjetit në prapavijë, nga pakujdesia ka kaluar me pjesën e majtë të veturës mbi trupin e fëmijës Xh.B., 4 vjeçar, i cili kishte vrapuar në drejtim të veturës.

Fëmija është dërguar menjëherë në QKMF-në e Pozheranit, por për shkak të plagëve të rënda ka ndërruar jetë. Viktima dhe i dyshuari janë në lidhje familjare (kushërinj), ndërsa familjarët kanë deklaruar se nuk kanë dyshime për ndonjë qëllim të keq dhe kanë kërkuar lirimin e trupit pa autopsi.

Në vendin e ngjarjes kanë dalë njësitë përkatëse policore dhe forenzika rajonale për të kryer ekzaminimet. Me urdhër të Prokurorisë së Shtetit – Departamenti i Përgjithshëm i PTH Ferizaj – i dyshuari është ndaluar për 48 orë nën dyshimin për veprën penale “Shkaktim i rrezikut të përgjithshëm”.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.