Pastrimi kimik i dëmton qytetares shapkat 610 euro, e dëmshpërblen me vlerë qesharake

Një qytetare e Tiranës është përballur me një situatë absurde pas një shërbimi të marrë nga pastrimi kimik Lavander, në ish bllok në Tiranë. Ajo shkruan se kishte dërguar një palë shapka luksoze Hermes të blerë në datën 29 maj me vlerën e 610 eurove, por shërbimi i pastrimit kimik në fjalë i ka dëmtuar.

Qytetarja thotë se i kishte dërguar për të rregulluar një dëmtim të vogël në shapka nga kontakti me shampo dhe punonjësit e lavanderisë në vend që të kryejë shërbimin e kërkuar, kanë lyer të gjithë sipërfaqen e shapkave me bojë duke dëmtuar produktin origjinal.

Qytetarja thotë se pas ndërhyrjes së pakërkuar, shapkat janë kthyer tërësisht të ndryshuara, me tegelat origjinale të zhdukura, taban të gërryer dhe pamje tërësisht të paidentifikueshme me origjinalin.

Denoncuesja thotë se ka kontaktuar me lavanderinë për një zgjidhje, dhe vlera e kthyer nga pastrimi kimik te qytetarja është vetëm 400 euro, ndërkohë që kishte paguar gjithashtu edhe 2500 lekë për shërbimin që në fakt e kishte dëmtuar produktin.

“Dua të ndaj një situatë absurde që më ndodhi me pastrimin kimik Lavander, ish bllok në Tiranë. Çova një palë shapka Hermes të reja, të blera më 29 maj për 610€, vetëm për të trajtuar një dëmtim shumë të vogël sipërfaqësor nga kontakti me shampo — thjesht për një lyerje të lehtë në një pjesë të vogël. Pa asnjë autorizim, lavanderia vendosi të lyejë të gjithë shapkën me bojë, duke fshirë tegelat origjinale, duke grryer tabanin dhe duke i shkatërruar plotësisht. Produkti u kthye i paidentifikueshëm.
Pas shumë sorollatjesh, më kthyen vetëm 400€, ndërkohë që kisha paguar edhe 2500 lekë për “shërbimin” që realisht i prishi shapkat. Kam faturën dhe të gjitha provat. Po e ndaj këtë si paralajmërim për të tjerët: kujdes kur çoni sende me vlerë në lavanderi që marrin përsipër shërbime pa transparencë dhe pa asnjë përgjegjësi për dëmet që shkaktojnë. Faleminderit”, shkruan qytetarja.

Qytetarja thekson se ka të gjitha faturat dhe provat që dokumentojnë ngjarjen, dhe vendosi ta bëjë publike për të paralajmëruar të tjerët që të tregojnë kujdes kur dërgojnë produkte me vlerë në lavanderi.