I dyshuari për tentimvrasje vetëdorëzohet në Polici

Një zhvillim i rëndësishëm është shënuar në rastin e tentimvrasjes që ndodhi më 14 prill 2025 në qytetin e Vitisë, ku një person që ishte në kërkim policor për më shumë se dy muaj është vetëdorëzuar tek autoritetet.

Burime të Sinjalit bëjnë me dije se më 23 qershor 2025, rreth orës 13:30, në Zyrat e Njësisë për Hetimin e Krimeve të Rënda në Gjilan është paraqitur i dyshuari Nikolin Marku, 22-vjeçar nga Vitia, i shoqëruar nga avokati i tij.

Ai ishte në kërkim që nga data 14 prill 2025, për shkak të dyshimeve se ka tentuar të vrasë Gabriel Markun, 25-vjeçar nga fshati Kabash, Komuna e Vitisë.

Ngjarja kishte ndodhur në rrugën “Brigada 173” në Viti dhe ishte iniciuar si “Vrasje në Tentativë”.

I dyshuari është intervistuar në prani të avokatit mbrojtës dhe me vendim të Prokurorit të Shtetit është ndaluar për 48 orë. Hetimet për rastin janë në zhvillim e sipër dhe pritet që Prokuroria të ndërmarrë hapat e radhës në përputhje me provat dhe dëshmitë e mbledhura.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.