Gruaja që u raportua e zhdukur gjendet në Gjermani

Një rast që fillimisht ishte trajtuar si “Person i zhdukur” ka marrë epilog të qetë pas hetimeve të ndërmarra nga Policia dhe njoftimit të autoriteteve gjermane.

Burime të Sinjalit mësojnë se më 16 maj 2025, Ardit Shpati, 27-vjeçar kishte paraqitur në Stacionin Policor të Fushë Kosovës një kallëzim për zhdukjen e nënës së tij, Luljete Shpati, 51-vjeçare e cila kishte ardhur nga Gjermania për një vizitë disa ditore te djali i saj.

Sipas kallëzimit, mëngjesin e 7 majit 2025, ai kishte gjetur në banesë një letër nga nëna e tij me përmbajtjen: “Unë po largohem nga këtu, jam jashtë shtetit, kalo mirë.”

Me urdhër të Prokurores kujdestare Nazmi Krasniqi, rasti ishte iniciuar si “Person i zhdukur”, ndërsa më 20 qershor 2025 hetimet kaluan te Njësia për Hetimin e Personave (NJHP), për shkak të mungesës së informacioneve për vendndodhjen e saj.

Pas një serie veprimesh hetimore, është konfirmuar se Luljete Shpati ndodhet në Gjermani dhe është atje me vullnetin e saj të plotë. Policia ka komunikuar me të dhe e njëjta i është lajmëruar edhe familjarëve.

Prokurori kujdestar pranë Prokurorisë Themelore në Prishtinë ka urdhëruar që rasti të mbyllet me raport të veçantë, pasi nuk ekziston më asnjë dyshim për zhdukje apo ndonjë rrezik për personin në fjalë.