Ky është shqiptari

Një ngjarje e rëndë ka tronditur zonën e Cilento-s në Itali, ku një sipërmarrës ndërtimi italian ka rrëfyer vrasjen e një të riu shqiptar gjatë një tentative grabitjeje.

Aurelio Valiante, 58 vjeç, ka pranuar para hetuesve se ka qëlluar për vdekje Rivaldo Rusi, 25 vjeç.

Ngjarja ndodhi gjatë natës mes të dielës dhe të hënës, kur një grup hajdutësh shqiptarë hynë me forcë në vilën e sipërmarrësit. Valiante, sipas hetimeve, reagoi duke marrë një armë gjahu dhe qëlloi drejt tyre. Si pasojë, njëri nga të rinjtë shqiptarë, 28 vjeç, mbeti rëndë i plagosur dhe ndodhet në gjendje kritike në spitalin “Cardarelli” në Napoli, ndërsa Rusi u vra në vend.

Në vend që të njoftonte policinë apo urgjencën, sipërmarrësi e tërhoqi trupin dhe e fshehu në një vaskë vere në një fermë në Limazzo, jo larg një fushe sportive.

Pas disa ditësh heshtjeje, Valiante pranoi ngjarjen përpara hetuesve të Prokurorisë së Vallo della Lucania. Ky rrëfim erdhi pas dëshmisë së të plagosurit, i cili deklaroi nga spitali:

“E pashë mikun tim të binte përtokë, pa ndjenja. Pastaj e tërhoqën zvarrë.”

Deklaratat fillimisht u pritën me skepticizëm, por më pas çuan në zbardhjen e plotë të ngjarjes. Në vendin e treguar nga biznesmeni, policia gjeti trupin. Në ato momente në vendngjarje ndodheshin gruaja dhe vjehrra e viktimës.

“Ai bëri një gabim”, thanë ato, duke shtuar “Por nuk duhej të kishte vdekur kështu. U varros si kafshë. Na la një fëmijë pa baba.”

Aurelio Valiante ndodhet tashmë nën arrest dhe do të përballet me akuzat për vrasje, fshehje kufome dhe lëndime të rënda trupore. Trupi i viktimës është dërguar në morgun e spitalit “San Luca” ku do t’i nënshtrohet autopsisë për të përcaktuar rrethanat e vdekjes.

Ngjarja ka ndezur debate në Itali për vetëmbrojtjen dhe tejkalimin e saj, ndërsa autoritetet po thellojnë hetimet për të përcaktuar nëse veprimet e Valiante përbëjnë mbrojtje të ligjshme apo një akt të qëllimshëm kriminal.