Dasma e Jeff Bezos në Venecia kap vlerën prej 30 milionë dollarësh

Jeff Bezos, njeriu i tretë më i pasur në botë me një pasuri prej 233 miliardë dollarësh sipas Bloomberg, po përgatit një dasmë luksoze në Venecia me partneren e tij Lauren Sánchez, shkruan Gazeta Sinjali.

Festa madhështore, që do të mbahet në një nga qytetet më romantike të botës, pritet të kushtojë rreth 30 milionë dollarë, sipas vlerësimeve të Daily Mail, ndërsa autoritetet italiane kanë folur për një efekt ekonomik prej më shumë se 40 milionë eurosh për rajonin.

Në këtë ngjarje pritet të marrin pjesë rreth 200 të ftuar VIP, përfshirë figura të njohura të botës së artit, teknologjisë dhe biznesit. Janë përgatitur deri në 27 fustane të ndryshme për nusen, ndërsa shefa të njohur kuzhine dhe ambientet më luksoze të Venecias do të jenë pjesë e festës.

Për një miliarder si Bezos, kjo shifër përfaqëson vetëm 0.01288% të pasurisë së tij—pra, në terma më të kuptueshëm, është sikur një qytetar italian me një pasuri mesatare prej 214,663 dollarësh të shpenzonte vetëm 23.57 euro për dasmën e vet.

Kjo nuk është hera e parë që themeluesi i Amazon-it bën shpenzime marramendëse: ai ka blerë më parë jahtin me vela Koru për 500 milionë dollarë, gazetën Washington Post për 250 milionë dhe është ndarë nga ish-bashkëshortja MacKenzie Scott për një shumë rekord prej 38.3 miliardë dollarësh.

Ndërkohë që shpenzimet janë të jashtëzakonshme, shpresa është që kjo martesë të jetë më jetëgjatë se e mëparshmja dhe, ndoshta, një nga më të paharrueshmet në historinë moderne të miliarderëve.