LDK mirëpret vendimin e Kushtetueses

Lidhja Demokratike e Kosovës ka mirëpritur aktgjykimin e Gjykatës Kushtetuese lidhur me konstituimin e Kuvendit të Kosovës, duke theksuar se vendimi sjell qartësi lidhur me të drejtat dhe detyrimet e grupit më të madh parlamentar dhe mënyrën e votimit në seancën konstituive, shkruan Gazeta Sinjali.

Në një komunikatë, LDK tha se aktgjykimi ka përcaktuar qartë se “grupi më i madh parlamentar nuk mund të bllokojë konstituimin e Kuvendit” dhe se ai duhet të “sigurojë shumicën e votave të deputetëve ose të arrijë konsensus me grupet e tjera parlamentare”.

Po ashtu, LDK thekson se paragrafi 187 i aktgjykimit kërkon që “kryesuesi i seancës konstituive të respektojë dispozitat kushtetuese, Kapitullin IV të Rregullores së Punës së Kuvendit dhe praktikat parlamentare”, duke shtuar se seanca duhet të vazhdojë me “votim të hapur”, sipas skenarit të dakorduar më herët.

Partia thekson përkushtimin për një parlamentarizëm funksional dhe ndërtimin e institucioneve që burojnë nga vullneti i qytetarëve, duke ftuar grupin më të madh parlamentar që të ndalë bllokimet dhe të kontribuojë në konstituimin e Kuvendit sa më parë.

“Ftojmë grupin më të madh parlamentar që të veprojnë në përputhje me këtë aktgjykim, t’i ndërpresin bllokimet dhe të kontribuojnë në konstituimin sa më të shpejtë dhe të rregullt të Kuvendit të Republikës së Kosovës,” thuhet në deklaratë.