Gruaja përfundon në ndalim policor për 48 orë në Prishtinë

Një rast kanosjeje që për pak sa nuk përfundoi në sulm të rëndë fizik është raportuar mbrëmë në rrugën “Indrit Caran” në Prishtinë, ku një çift bashkëshortor është përfshirë në një konflikt të ashpër.

Burimet e Sinjalit mësojnë se më 26 qershor 2025, rreth orës 20:40, G. K., 37 vjeçar ka raportuar në polici se bashkëshortja e tij, R.V, 45 vjeçare, ka tentuar ta sulmojë me thikë, pas një mosmarrëveshjeje verbale mes tyre.

Palët janë shoqëruar në stacion policor dhe janë intervistuar lidhur me rastin. E dyshuara ka mohuar të ketë pasur qëllim sulmi, por ka pranuar se gjatë debatit verbal e kishte thikën në dorë pasi ishte duke përgatitur ushqim.

Ajo ka deklaruar se ndodhej në gjendje të rënduar emocionale, për shkak të përvjetorit të vdekjes së nënës së saj, por ka këmbëngulur se nuk kishte qëllim të lëndonte askënd.

Pas shqyrtimit të deklaratave, me vendim të prokurores kujdestare për dhunë në familje, rasti është iniciuar si “Kanosje”, ndërsa e dyshuara është ndaluar për 48 orë dhe është dërguar në mbajtje.

Hetimet janë në vijim për të sqaruar plotësisht rrethanat e ngjarjes.