Konflikt mes vjehrrës dhe nuses në Prishtinë

Një rast i pazakontë dhune në familje është raportuar mbrëmjen e djeshme në rrugën “Asllan Pireva” në Prishtinë, ku vjehrra dhe nusja kanë akuzuar njëra-tjetrën për dhunë fizike dhe psikike.

Burimet e Sinjalit mësojnë se më 26 qershor 2025, rreth orës 19:30, Policia ka ndërhyrë pas një informate për konflikt familjar. Në vendin e ngjarjes janë identifikuar si të dyshuara N. A., 67 vjeçare dhe B. I., 34 vjeçare, të cilat janë shoqëruar në stacion për intervistim.

Sipas deklaratës së vjehrrës, nusja e saj e ka ofenduar me fjalë të rënda, duke ushtruar dhunë psikike dhe fizike, ndërsa e njëjta ka thënë se nuk ndihen të sigurta nën të njëjtën çati.

Nga ana tjetër, B.I ka deklaruar se vjehrra e akuzon për pamoralitet dhe e fyen vazhdimisht, duke ndikuar rëndë në gjendjen e saj emocionale. Ato jetojnë në të njëjtën shtëpi, por kanë marrëdhënie të tensionuara dhe nuk komunikojnë fare.

Të dyja palët kanë pranuar tretman mjekësor, por kanë refuzuar qëndrimin në strehimore. Ato kanë deklaruar se ndihen të rrezikuara nga njëra-tjetra.

Lidhur me rastin është njoftuar prokurori i shtetit, i cili ka urdhëruar që rasti të iniciohet si “Dhuna në familje”, ndërsa të dyshuarat janë liruar në procedurë të rregullt. Gjithashtu, është udhëzuar që bashkëshortët e tyre të intervistohen në cilësinë e dëshmitarëve.

Rasti është nën hetim nga njësia për dhunë në familje.