Khamenei shfaqet për herë të parë pas armëpushimit

Udhëheqësi Suprem i Iranit, Ajatollah Ali Khamenei, ka dërguar një paralajmërim të qartë ndaj Shteteve të Bashkuara, duke thënë se çdo sulm i ardhshëm amerikan do të marrë përgjigje të menjëhershme me goditje ndaj bazave ushtarake të SHBA-së në Lindjen e Mesme.

Khamenei, 86 vjeç, e dha këtë mesazh në fjalimin e tij të parë televiziv që nga shpallja e armëpushimit mes Iranit dhe Izraelit. Ai e quajti situatën një “fitore”, pas 12 ditësh lufte që përfunduan me një sulm të Iranit ndaj bazës më të madhe amerikane në rajon – asaj në Katar.

“Ashtu si në komentet e tij të fundit, të publikuara më shumë se një javë më parë gjatë bombardimeve izraelite, ai foli nga një vend i fshehtë,” raportoi Reuters.

Në fjalimin e regjistruar paraprakisht dhe të transmetuar në televizionin shtetëror iranian, Khamenei u shpreh qartë: Irani “nuk do të dorëzohet.”

Ndërkohë, nga ana tjetër e globit, presidenti amerikan Donald Trump ka deklaruar se SHBA është e gatshme për çdo veprim të ri të Iranit. I pyetur nëse SHBA do të godiste përsëri nëse Irani rindërton programin e tij bërthamor, Trump është përgjigjur thjesht: “Sigurisht.”

Ai shtoi më tej: “SHBA kishte zhdukur programin bërthamor të Iranit.”

Nga Izraeli, kryeministri Benjamin Netanyahu ka bërë të njëjtën deklaratë për “fitore”, duke thënë të martën se armëpushimi i brishtë që hyri në fuqi përbën një arritje të madhe për vendin e tij.

“Një fitore historike,” e quajti Netanyahu, duke shtuar se Izraeli “kishte arritur qëllimin e tij për të hequr kërcënimin bërthamor dhe balistik të Teheranit.”

Pas fjalimit të Khameneit, Netanyahu publikoi edhe një mesazh simbolik në rrjetet sociale, së bashku me një fotografi ku shfaqet duke mbajtur duart me presidentin Trump, duke shkruar: “Ne do të vazhdojmë të punojmë së bashku për të mposhtur armiqtë tanë të përbashkët.”