Limaj konfirmon pjesëmarrjen në takimin e thirrur nga Kurti

Kreu i NISMA Socialdemokrate, Fatmir Limaj, ka reaguar lidhur me zhvillimet e fundit politike pas publikimit të aktgjykimit të Gjykatës Kushtetuese, që e cilëson bllokadën në Kuvend si situatë që duhet zgjidhur përmes një marrëveshjeje politike brenda 30 ditëve.

Përmes një postimi, Limaj ka rikujtuar se qëndrimi i NISMA-s menjëherë pas zgjedhjeve ishte i qartë – se për interesa nacionale, partia e tij ishte e gatshme të bisedonte me cilindo lider politik.

“Sot, kur të gjithë liderët politikë janë ftuar në një tryezë nga kryetari i Vetëvendosjes dhe po e pranojnë nevojën për një marrëveshje politike, është me rëndësi të kujtojmë se kjo nuk është një rrugë e re, por është rruga që ne e kemi propozuar muaj më parë!

Rrugë që atëherë u kontestua, u nënvlerësua, u kritikua, e madje u shoqërua edhe me linçim publik”, ka shkruar Limaj, në një mesazh që duket të jetë drejtuar ndaj kryetarit të AAK-së, Ramush Haradinaj, i cili ka deleguar deputeten Time Kadriaj në tryezën e ftuar nga Kurti, ndërsa më herët e kishte sulmuar Limajn për gatishmërinë për takim me të.

Tutje, Limaj ka theksuar se aktgjykimi i Kushtetueses flet qartë për nevojën e një zgjidhjeje politike dhe jo për manovra e bllokada.

“Gjykata Kushtetuese e ka bërë të qartë: Zgjedhja e Kryetarit të Kuvendit është proces që kërkon marrëveshje politike, jo bllokim, jo taktika dhe jo shfaqje publike. Fatkeqësisht, e gjithë kjo kohë nuk u përdor për zgjidhje, por për akuza, ndarje dhe hipokrizi politike. Sot gjithçka është bërë e qartë. Qëndrimi ynë ka qenë i drejtë, dinjitoz dhe në shërbim të vendit”, thekson ai.

Në fund, Limaj ka konfirmuar se do të marrë pjesë në tryezën e ftuar nga Albin Kurti.

“Kosova ka nevojë për marrëveshje, jo për teatër politik. Për lidership, jo për kalkulime”, përfundon Limaj.