Sulm në parking në qendër të Prishtinës – 29 vjeçari godet të miturin pas një mosmarrëveshje në trafik

Një incident i rëndë është regjistruar mbrëmjen e së premtes në rrugën “Fehmi Agani” në Prishtinë, ku një mosmarrëveshje në parking ka degjeneruar në sulm fizik ndaj një të mituri.

Sinjali mëson se viktima është 16-vjeçari E.S, i cili është sulmuar nga Mën Selmani, 29-vjeçar, pas një përplasjeje verbale që kishte ndodhur në rrethana të lidhura me qarkullimin dhe vendparkimin.

Sipas burimeve, i dyshuari e ka goditur të miturin në pjesën e fytyrës, duke i shkaktuar lëndime trupore, për çka viktima ka kërkuar trajtim mjekësor pas incidentit.

Të dy janë intervistuar nga Policia, ndërsa me urdhër të Prokurorit kujdestar, ndaj të dyshuarit është marrë masa e ndalimit për 48 orë.

Rasti është iniciuar si “Lëndim i lehtë trupor” dhe po trajtohet nga njësitet kompetente.