Rrahje për xhelozi – Gruaja konsumon preparat mizash për vetëlëndim

Një rast i dhunës në familje është regjistruar mbrëmjen e së premtes në fshatin Janosh të Gjakovës, ku një përplasje verbale dhe fizike për motive xhelozie mes bashkëshortëve ka përfunduar me ndërhyrjen e Policisë dhe ndalimin e burrit.

Burimet e Sinjalit bëjnë me dije se bëhet fjalë për çiftin K.Z dhe L.K., të cilët fillimisht ishin fjalosur, për të vazhduar më pas me kontakt fizik (shtyrje), nga e cila të dy kishin pësuar gërvishtje të lehta.

Pas incidentit, viktima dyshohet të ketë konsumuar një preparat mizash me qëllim vetëlëndimi, për çka është dërguar me urgjencë në Qendrën e Mjekësisë Emergjente. Megjithatë, ajo ka mohuar se kishte për qëllim të lëndonte veten.

Pavarësisht rastit, viktima ka refuzuar që të strehohet apo të kërkojë urdhër mbrojtjeje. Ajo është kthyer vullnetarisht në shtëpinë ku ndodhi incidenti, duke deklaruar se nuk ndjehet e rrezikuar nga bashkëshorti.

Në lidhje me këtë ngjarje, është njoftuar Prokurori kujdestar, i cili ka urdhëruar ndalimin e të dyshuarit për 48 orë. Rasti është iniciuar si “Dhuna në familje” dhe po hetohet nga njësitë kompetente.

Shënim: Personi e apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.