Zbulohet një trup i dyshuar nga lufta në varreza

Një zbulim tronditës është bërë sot në varrezat e qytetit në Brekoc të Gjakovës, ku një qytetar, teksa po hapte një varr, ka hasur në mbetje eshtërore njerëzore që dyshohet se i përkasin periudhës së luftës 1998/1999.

Sipas burimeve të Sinjalit, rreth orës 11:00 është aktivizuar Sektori për Hetimin e Personave të Zhdukur Gjatë Luftës, që vepron pranë Drejtorisë për Hetimin e Krimeve të Luftës.

Në vendin e ngjarjes kanë dalë hetuesit dhe ekipi i Mjekësisë Ligjore, të cilët në bashkëpunim me Prokurorin e Prokurorisë Speciale kanë bërë ekzaminimin fillestar të mbetjeve eshtërore.

Pas procedurave të dokumentimit dhe kodimit me TZA, mbetjet janë vlerësuar si të periudhës së luftës dhe me interes të lartë forenzik.

Ato janë dërguar menjëherë në Institutin e Mjekësisë Ligjore, ku do t’i nënshtrohen autopsisë dhe analizës së ADN-së për të mundësuar identifikimin e viktimës.

Rasti ka ngjallur ndjeshmëri të madhe dhe konsiderohet si një tjetër hallkë e rëndësishme në përpjekjet për zbardhjen e fatit të personave të zhdukur gjatë luftës në Kosovë.