51 vjeçari kanos dhe ofendon gruan e tij

Një tjetër rast shqetësues i dhunës në familje është shënuar në Prishtinë, ku një burrë ka përfunduar në ndalim policor pasi ka ofenduar dhe kanosur rëndë bashkëshorten e tij – nënën e katër fëmijëve të tij.

Burimet e Sinjalit bëjnë me dije se incidenti ndodhi më 28 qershor në rrugën “Lezha” në Prishtinë, ku viktima A.N., 49 vjeçare ka denoncuar në policor se bashkëshorti i saj, E. Vi., 51 vjeçar, pas një zënke në banesën e tyre, ka shpërthyer në ofendime të ashpra dhe e ka kanosur duke i thënë: “T’i tregoj unë kush jam!”.

Sipas saj, konflikti nuk është i ri. Ajo ka treguar se që nga fillimi i martesës kanë pasur mosmarrëveshje të vazhdueshme, shoqëruar me dhunë psikike dhe fizike, për të cilat ka raportime të mëhershme në Polici.

Pas denoncimit, policia ka ndërhyrë menjëherë duke arrestuar të dyshuarin. Me urdhër të prokurorit kujdestar, atij i është caktuar masa e ndalimit për 48 orë dhe ndaj tij është iniciuar rasti penal për veprën “Kanosje”.

Rasti mbetet nën hetime.