Dyshohet se rrahu dy djemtë e tij të mitur – Babai përfundon në pranga

Një rast tronditës i dhunës në familje është raportuar në komunën e Graçanicës, ku një burrë dyshohet se ka sulmuar fizikisht dy fëmijët e tij të mitur.

Burime të Gazetës Sinjali brenda Prokurorisë bëjnë me dije se ngjarja dyshohet të ketë ndodhur më 26 qershor, ndërsa është raportuar më 28 qershor në Stacionin Policor në Graçanicë.

Ankuesja, N.G., 36 vjeçare, ka deklaruar se bashkëshorti i saj, R.A., 42 vjeçar, ka ushtruar dhunë psikike dhe fizike ndaj dy djemve të tyre të mitur: M.A., 12 vjeçar dhe M.A., 9 vjeçar. Pas incidentit, të miturit kanë marrë trajtim mjekësor.

Rasti është trajtuar me seriozitet nga autoritetet, ndërsa Prokurori për të Mitur ka urdhëruar që ndaj të dyshuarit të iniciohet rasti “Keqpërdorim apo braktisje e fëmijës”.

I dyshuari është ndaluar për 48 orë, në pritje të veprimeve të mëtejshme hetimore.

Policia dhe Prokuroria po vazhdojnë hetimet për të zbardhur plotësisht motivet dhe rrethanat e ngjarjes.