Tragjedi në SHBA: Zjarrfikësit bien në kurth të armatosur gjatë ndërhyrjes në zjarr

Dy persona, që besohet të jenë pjesë e shërbimit zjarrfikës, janë vrarë dhe disa të tjerë janë plagosur gjatë një incidenti të rëndë të armatosur në Coeur d’Alene, Idaho, ndërsa i përgjigjeshin një njoftimi për zjarr në zonën natyrore të Malit Canfield, shkruan Gazeta Sinjali.

Sipas Sherifit të Qarkut Kootenai, Robert Norris, të paktën një person i armatosur vazhdon të qëllojë ndaj forcave të rendit me një pushkë të fuqishme. Oficerët raportuan të shtëna nga disa drejtime, duke ngritur dyshime se mund të ketë më shumë se një sulmues.

Norris paralajmëroi se operacioni për neutralizimin e kërcënimit mund të zgjasë disa ditë. “Ky ka të ngjarë të jetë një operacion disaditor… Shpresoj që dikush të ketë një shans të qartë për të neutralizuar sulmuesin,” tha ai.

Zjarri, që mbulonte një sipërfaqe prej rreth gjysmë akri, dyshohet se u shkaktua qëllimisht për të tërhequr shërbimet e emergjencës në një pritë të planifikuar.

Menaxhimi i Emergjencave ka kërkuar nga banorët që të qëndrojnë në strehim dhe të shmangin zonën. Në vendngjarje janë angazhuar agjenci të shumta, përfshirë FBI-në, e cila po ofron mbështetje taktike dhe operacionale.

Guvernatori i Idaho-s, Brad Little, e dënoi ngjarjen si një “sulm të tmerrshëm” ndaj zjarrfikësve, duke u bërë thirrje qytetarëve të luten për viktimat dhe familjet e tyre.

Incidenti ndodhi në një park prej 24 akrash me shtigje për ecje dhe pyje të dendura, çka po e vështirëson operacionin e sigurisë. Autoritetet nuk kanë dhënë ende një bilanc të saktë të të plagosurve.