Ky është i riu që sulmoi policin
Gazeta Sinjali sjell identitetin e personit që mbrëmë në Kaçanik sulmoi një zyrtar policor gjatë kryerjes së detyrës dhe u kap me armë të ftohta në veturën e tij.
Bëhet fjalë për Blendion Mezraja, 21-vjeçar, i cili u ndalua nga patrulla policore në rrugën “Vëllezërit Çaka”, pasi ishte në ndjekje nga dy zyrtarë të tjerë. Gjatë kontrollit, ai ka rezistuar dhe ka sulmuar një nga policët me shqelma, duke e goditur në këmbë.
Pas ndalimit, në veturën e tij janë gjetur dy thika, për të cilat ka deklaruar se i posedonte vetë.
Me urdhër të Prokurorit kujdestar, ai është dërguar në ndalim për 48 orë, ndërsa ndaj tij është iniciuar rasti për “Sulm ndaj personit zyrtar gjatë detyrës zyrtare” dhe “Armëmbajtje pa leje”.
Hetimet lidhur me rastin janë duke vazhduar.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
