Gjuajtje me armë në Prishtinë

Një ngjarje e rëndë ka ndodhur pas mesnate në Prishtinë, ku një person është qëlluar me armë zjarri në rrethana ende të paqarta.

Burimet e Gazetës Sinjali bëjnë me dije se rreth orës 01:34 të datës 2 korrik, Policia është alarmuar për të shtëna armësh në rrugën “Nazim Gafurri”, ku një person i dyshuar kishte shtënë drejt një qytetari të identifikuar si K.D., rreth 55-vjeçar

Sipas informacioneve fillestare, i dyshuari ishte parë fillimisht në këmbë, i veshur me maicë të zezë, e më pas ishte larguar nga vendi i ngjarjes me një motor. Sulmin e ka parë edhe një dëshmitar tjetër.

Në vendin e ngjarjes kanë dalë njësitë e hetimeve dhe forenzikës, të cilat kanë siguruar katër gëzhoja të armës së zjarrit.

Me urdhër të Prokurores së Krimeve të Rënda, janë nisur hetimet fillestare dhe është kërkuar sigurimi i pamjeve nga kamerat e sigurisë në zonë për zbardhjen e plotë të rastit.

Rasti është nën hetim dhe pritet kualifikimi penal në koordinim me Prokurorinë.